نحسابك بنت اصحاري ((شعر شعبي))

نحسابك بنت اصحاري ((شعر شعبي))
بواسطة: جلول بن يعيش

قصيدة شعبية في حب الكلمة مهداة إلى كل من يحمل بين جوانحه شهوة الإبداع

نحسابك بنت اصحاري وطنك خيمة وارمال
تبغي راكب لمهاري لمعمّم بو سلهام

قلت انا واش اداني اولا خصلة م لخصال
تشفع لي بين اقراني يزّاني م لوهام

كيفاش انا تختاري اوشرطك ماهو من مال
يلقيك ابواحد قاري و ناظم فيك اكلام

أنا قانع باعذاري ماني طامع بوصال
وانت فاصل إشهاري في فيلم م لفلام

من وصّل ليك اخباري اوقال ليك انا قوّال
آه يالفاضح لسراري ،وتعاهدني بكتام

ردّي بالك اتغاري وتديريني فالبال
أهوايا لعب اذراري محبة وم بعد اخصام

قالت لي تتحداني واشحال اغويت ارجال
يا ويحو من عاداني وارجع ليا خدام

أنا قمرة ازماني وابزيني ما نختال
معذور اللي يهواني في عشقو ما يتلام

لوكان أقلعت اعجاري نصرع عقلك بهبال
واتجي مورايا جاري مغبّر حافي لقدام

ترجى نقلع ايزاري ،باش انقلعو محال
خايفة تشطح فاسهاري رابط نصّك باحزام

وخايفة تتبع زمّاري اعلى صدرك طبّال
وتعايب عود اوتاري تطربني بالأنغام

تغني ياشمس انهاري واش اطلوعك مزال
يكفاني غير اقراري بجوابي انزيد اهيام

وتنطق بلسان القاوري:جي pas دامور sans آل
ويا ريت تجبر لي خاطري :بموا  aussiجو تام

أسمع وافهم لمعاني واعرف من صال اوجال
دوك اللي دركو شاني رفعوني كي لعلام

كم من فارس ارماني وارماو اعليه انبال
وكم من شاعر بكاني قطعوا راسو بحسام

وكم من واصل حداني واسكر من فيض الحال
عرّفتو بالوحداني وطلع بمقام امقام

وكم من عالم خلاني نتداول للأجيال
بوراق اكتوب اكساني اوبيا حاز اوسام

وكم من وارث القاني بصّاح من الجهّال
مايعرف سر اكناني واقداني كي لفدام

وكم من واعظ ببياني خلّد حكمة وامثال
وكم من مادح بهّا ني بقصايد للحكّام

وكم من ساحر باضراري سبب للناس اعلال
وكم من طالب باسواري دواهم م لسقام

شعّل لي عود اقماري وارسمني في لخيال
لو ما جيتك باجهاري انزورك في لمنام

عشقك واضح عيناني وتسترو بالغربال
قول لي حبّك رشّاني ياشمعة وسط اظلام

قلت الها بيك ابلاني سبحانو ذو الجلال
أنتيا بنت الساني وازواجو بيك احرام

جلول اسمي واشعاري ما تحتج للأوّال
كونك بالكلمة داري لو قلت انت فهام

وصلو على نور اعياني ياللي سمعتو لمقال
محمد العدناني بالفين اصلاه واسلام